Inanunsyo ng Gilead Sciences, Inc., na inaprubahan na ng U.S. Food and Drug Administration (FDA) ang antiviral drug na remdesivir, para panggamot sa mga pasyenteng may COVID-19 na nasa ospital.
Ayon sa Gilead, ang gamot na ang brand name ay Veklury, ang tanging panggamot para sa COVID-19 na inaprubahan sa ilalim ng isang mas mahigpit na proseso.
Gayunman, may iba pang mga paggamot na inaprubahan din para gamitin sa emergency, subalit ang ibinigay na pahintulot ay maaaring bawiin sa sandaling matapos na ang coronavirus pandemic.
Ang iba pang gamot gaya ng steroid na dexamethasone, ay ginagamit din sa paglaban sa COVID-19.
Samantala, binigyan din ng pansamantalang pahintulot ng Europe at iba pang mga bansa gaya ng Canada, ang paggamit sa remdesivir.
Ang remdesivir na ibinibigay sa pamamagitan ng injection, ay isa sa mga unang gamot na nagpakita ng pag-asa sa pagpapabilis ng paggaling ng ilang pasyenteng may coronavirus.
Subalit ang bisa nito para mabawasan ang pagkamatay bunga ng COVID-19, ay hindi pa napatutunayan.
Maaari itong ibigay sa mga matatanda at batang lampas ang edad sa 12, na tumitimbang ng higit sa 40 kilo (88 libra) na kailangang dalhin sa ospital para magamot, dahil ito ay maaari lamang ibigay sa mga pasyenteng nasa ospital.
Binigyan naman ng emergency approval ang remdesivir para magamit sa mga batang pasyente na wala pang doce anyos, na tumitimbang ng hindi bababa sa 3.5 kilo.
Si US President Donald Trump, na nagpositibo sa coronavirus sa unang bahagi ng Oktubre, ay binigyan ng remdesivir kasama ng iba pang mga gamot.
Ang naturang gamot ay itinakda ng Gilead sa halagang $390 bawat vial sa developed countries.
© Agence France-Presse
