Hindi pagdalo ni dating Pangulong Noynoy Aquino sa SONA ni Pangulong Duterte iginagalang ng Malakanyang

Nirerespeto ng Malakanyang ang desisyon ni dating Pangulong Noynoy Aquino na huwag dumalo sa ikalawang State of the Nation Address o SONA ni Pangulong Rodrigo Duterte.

Sinabi ni Presidential Communications  Office Secretary Martin Andanar nasa dating Pangulo naman  ang pasya kung tatanggapin o tatanggihan ang imbitasyon ng Malakanyang bilang bahagi ng protocol sa mga dating Pangulo ng bansa.

Inihayag ni  Andanar na lahat naman ng naging Pangulo ay pinadalhan  ng imbitasyon na kinabibilangan nina  dating Pangulong Fidel V. Ramos Joseph Estrada gayundin si  Pampanga Representative Gloria Arroyo.

Ito na ang ikalawang pagkakataong hindi dadalo si dating Pangulong Aquino sa  SONA ng Pangulong Duterte.

Samantala, inihayag ni  Andanar na pagkatapos ng SONA  ng Pangulo ay magpapatawag ito ng Press Conference.

Ito ang unang pagkakataon na ang sitting President ay magpapatawag ng Press Conference pagkatapos ng SONA.

Ulat ni: Vic Somintac