52-anyos na pulis na nakatalaga sa Zamboanga city, ika-66 Covid-19 fatality ng PNP

Malungkot na inanunsiyo ni PNP Chief Police General Guillermo Eleazar na isang Police captain na nakatalaga sa Zamboanga city ang pinakahuling namatay sa Pambansang Pulisya dahil sa Covid-19.

Ayon sa PNP Chief, ang 52-anyos na pulis ay nagpositibo sa virus noong May 2 at kaagad siyang dinala sa pagamutan.

May 18, inilipat ang pasyente sa ICU dahil sa hirap sa paghinga at isinailalim sa intubation.

Ngunit namatay din kahapon, May 30, alas-5:22 ng umaga.

Patuloy naman ang paalala ni Eleazar sa mga pulis na doblehin ang pag-iingat hindi lamang para sa kanilang sarili kundi pati na rin sa kanilang pamilya.

Hindi rin aniya dapat magdalawang-isip na magpa-check-up at kaagad na magtungo sa pinakamalapit na clinic kung mayroong naramdamang sintomas ng Covid-19.

Sa pinakahuling datos ng PNP Health service ngayong May 31, nakapagtala ang PNP ng 116 bagong mga kaso kaya pumalo na sa 23,983 ang kabuuang kaso ng Covid-19.

May naitala ring 73 personnel na gumaling sa karamdaman kaya pumalo na sa 22,067 ang recovered cases.