Operasyon ng LRT-1, naantala dahil sa lalaking tumalon sa riles

Naantala ang operasyon ng LRT-1 matapos tumalon ang isang lalaki sa riles ng tren sa Monumento Station, bandang alas 4:40 kaninang madaling araw.

Ayon sa paunang imbestigasyon, bigla na lang tumalon ang lalaki na nakilalang si Georick John Labrador,
22-anyos at taga Sta. Maria, Bulacan habang paparating ang isang tren sa northbound ng Monumento station.

Sinabi ni Light Rail Manila Corporation (LRMC) spokesperson Jacqueline Gorospe, buhay at may malay nang maisalba ng mga tauhan ng LRT-1 at mga rumespondeng awtoridad ang lalaking tumalon, at dinala sa malapit na pagamutan.

Samantala, pansamantala munang nilimitahan ang operasyon ng LRT-1 dahil sa pangyayari.

Ibinalik naman sa normal ang operasyon sa lahat ng istayon ng LRT-1 bandang ala-5:59 ng umaga.

Mark Leo Pernia