Mobile swab testing units at vaccination team, inilunsad ng QC LGU at USAID
Anim na bagong COVID-19 mobile testing units at isang mobile vaccination team ang inilunsad ng US Agency for International Development (USAID) at Quezon City government bilang suporta sa laban ng lungsod sa nasabing sakit.
Dinaluhan nina US Embassy in the Philippines Chargé d’Affaires (CDA) ad interim Heather Variava, Quezon City Mayor Joy Belmonte, Health Undersecretary Maria Rosario Vergeire at iba pang mga opisyal ang hand over ng mobile testing and vaccination units sa Quezon City Hall.
Bubuuin ng 30 healthcare workers ang mobile vaccination at testing teams.
Makikinabang sa pagpapaigting ng testing efforts at vaccination coverage ang mga mahihirap na pamilya, senior citizens, vulnerable groups, at hard-to-reach areas sa lungsod.
Magkakaloob ang mobile testing initiative ng dagdag na 6,000 COVID tests bukod pa sa 20,000 monthly testing coverage ng QC LGU.
Makapag-aambag naman ang mobile vaccination team ng 15,000 vaccinations kada buwan.
Tutulong din ang USAID sa ProtekTodo vaccination campaign ng QC government sa pamamagitan ng pag-deploy ng 10 healthcare workers para umalalay sa vaccine operations sa anim na key city districts.
Kasabay nito, inanunsiyo ng US Embassy ang karagdagang Php565 million ($11.3 million) COVID-19 assistance sa Pilipinas.
Ang nasabing tulong ay sa ilalim ng American Rescue Plan Act (ARPA).
Ayon sa US Embassy, ang karagdagang pondo ay magpapalakas sa kapasidad ng mga LGUs sa pagresponde sa pandemya at pagpapabilis ng COVID vaccination sa mga high-risk areas.
Moira Encina
