Mga opisyal ng RCBC at Philrem, inirekomendang kasuhan ng DOJ ng money laundering
Nakitaan ng DOJ ng sapat na batayan para sampahan ng kasong money laundering ang mga opisyal ng RCBC at Philrem Service Corporation kaugnay sa $81M na nakaw na salapi mula sa Bangladesh Bank.
Sa consolidated review resolution ng DOJ, inirekomendang sampahan ng walong bilang na kasong paglabag sa Republic Act 9160 o Anti Money Laundering Act si datingRCBC Jupiter Branch Manager na si Maia Santos-Deguito.
Pinakakasuhan din ng kaparehong kaso ang bank depositor na nakilala lamang sa mga pangalang Michael Francisco Cruz, Jessie Christopher Lagrosas, Alfred Santos Vergara at Enrico Teodoro Vasquez.
Apat na ulit ng reklamong paglabag saRA 9160 ang ipinakakaso sa mga may-ari ng Philrem na sina Salud Bautista, Michael Bautista at Anthony Pelejo.
Sinabi ng DOJ na nakipagsabwatan si Deguito sa mga depositor na ang tunay na pangalan ay hindi pa mabatid nang aprubahan nito ang pagbubukas ng mga bank account kung saan idineposito ang 81-million dollars.
Batay sa resolusyon, hindi maaring gawing depensa ng Philrem na wala silang alam sa nangyaring pagnanakaw sa Bangladesh Bank.
Noong Pebrero ng nakaraang taon, na-hack ang Bangladesh Bank at ang 81 million dollars na pondo nito ay idineposito saRCBC Jupiter Branch.
Ulat ni: Moira Encina
