Mga senador hati sa isyu kung kailangan pang ituloy ang impeachment trial kay resigned Comelec Chairman Bautista
Hati ang pananaw ng mga senador kung kailangan pang ituloy ang impeachment trial laban sa nagbitiw na si Comelec Chairman Andres Bautista.
Ayon kay Senate Majority leader Vicente Sotto, wala nang silbi ang impeachment case na inihain laban kay Bautista at wala nang dahilan para ituloy pa ang impeachment trial dahil epektibo na ang pagbibitiw nito.
Pero giit ni Senador Francis Escudero, ang Kamara ang dapat magdesisyon sa isyu dahil hindi pa naman naisusumite ang articles of impeachment sa senado.
Maari pa aniya itong talakayin ng Kamara para patawan si Bautista ng karagdagang parusa gaya ng perpetual disqualification o hindi na papayagang maupo sa anumang posisyon sa gobyerno.
Ngunit kung pagbabatayan aniya ang 2001 case na Estrada vs Desierto, nag-rule ang Korte Suprema na maituturing na moot ang impeachment complaint oras na matanggal o bumaba na sa pwesto ang isang impeachable official.
Ulat ni Meanne Corvera
