PNP hiniling sa hukuman na mailipat ng kulungan si Supt. Rafael Dumlao na akusado sa Jee Ick Joo kidnap slay
Naghain ng mosyon ang PNP sa Angeles City, Pampanga Regional Trial Court para ilipat sa regular na piitan si Supt. Rafael Dumlao na akusado sa Jee Ick Joo kidnap-slay.
Sa kanilang mosyon sa Branch 58, sinabi ni PNP Custodial Service Unit Headquarters Support Service head Supt. Arnel Jamandron Apud na dapat ikulong si Dumlao sa isang jail facility sa Pampanga.
Hindi aniya dapat tratuhin bilang ‘sacred cow’ si Dumlao dahil ito ay paglabag sa equal protection clause at discriminatory.
Tinukoy pa ni Apud na mistulang VIP detainee si Dumlao sa PNP Custodial Center dahil sa malaki at maaliwalas nitong selda doon kung ikukumpara sa ibang BJMP facility.
Praktikal lang din aniya na ilipat sa Angeles City mula sa Kampo Krame sa Quezon City si Dumlao para mabawasan ang banta sa seguridad nito at sa kanyang mga escort sa pagdalo sa court hearing.
Nakatakdang basahan ng sakdal si Dumlao sa may 31 para sa kasong kidnapping for ransom with homicide.
Nahaharap din ito sa kasong carnapping, at kidnapping and serious illegal detention kaugnay sa pagdukot sa kasambahay ng Korean businessman.
Ulat ni: Moira Encina
