Mga Pinoy, hinimok ng pamahalaan na mag-impok sa bangko para sa bayan
Hinikayat ng National Treasury ang mga Pilipino na pag-aralan kung paano ang wastong pag-iimpok at pag-iinvest ng pera.
Sa Economic briefing sa Malakanyang sinabi ni National Treasurer Rosalia de Leon na ito ang rason kung bakit nila inilunsad ang “Invest Pa More, Panalo Pa More Premyo Bonds Para Sa Bayan”.
Layon umano nito hikayatin ang mga small savers at makiisa sa nation building lalo na’t ang “Premyo” bond ay naglalayon din na makalikom ng pondo para sa implementasyon ng Universal Health Care (UHC) at free tertiary education sa mga state universities and colleges.
Sa naturang programa ma-eengganyo umano ang mga mamamayan na masanay at matuto sa pag-iinvest sa government securities.
Maliban dito ay may tiyansa rin umanong manalo ang mga sasali sa premyo bond ng P20, 000, P100, 000 at hangang P1 million.
Puwede umanong maglagak ng minimum investment na P500 hanggang P10 million ang interasadong indibidwal na gusto sumali sa Premyo Bond.
Ulat ni Vic Somintac
