Monty Williams ng Phoenix Suns, pinarangalan ng NBA Coach of the Year Award

Nakuha ni Monty Williams ng Phoenix Suns, ang Red Auerbach Trophy bilang NBA Coach of the Year para sa 2021-22 season.

Landslide ang nakuhang boto ni Williams kung saan nakatanggap siya ng 81 first-place votes at natapos na may 458 overall points sa boto ng panel ng 100 sportswriters at broadcasters.

Ito ang unang NBA Coach of the Year Award ni Williams, kung saan makakasama na siya nina Cotton Fitzsimmons (1988-89) at Mike D’Antoni (2004-05) bilang mga unang coaches ng Suns na nakakuha rin ng nasabing award.

Noong isang buwan, si Williams ay pinarangalan ng National Basketball Coaches Association Coach of the Year Award para sa ikalawang sunod na season.

Ang 50-anyos na si Williams ay nasa ikatlong season na bilang head coach ng Suns.