“Memes” Ginagawa Mo rin ba Ito?

For sure, may ganito sa mga kakilala n’yo o baka isa na kayo na  kailangan pang gisingin para bumangon? Kapag nagising na pagtalikod ng  gumising sa atin ay ginagaya natin ang salita o kaya ang “facial expressions” nila.

Puwede na sa pagbukas natin ng social media, nakita natin ang mga “posing” ng hinahangaang artista at may caption na “woke up like this” at gagayahin din natin ang pose.

Today, aalamin natin ang “memes”, saan ba nagsimula ang salitang ito, pero, bago ‘yan …

Bakit nga ba marami ngayon ang gumagawa ng Memes?

Ang mga katagang hindi malilimutan mula sa mga pelikula tulad ng:

“Walang himala!” ni Ate Guy o Nora Aunor. Sa pelikulang “Himala”

“Akala mo lang wala! Pero meron, meron!” ni Carlo Aquino sa pelikulang Bata, bata paano ka ginawa? na isinulat ni Lualhati Bautista.

 Maging sa mga political statement like, “I am Sorry!” ng dating pangulong Gloria Macapagal Arroyo, at ngayon pandemya naman ang mga katagang “bawal lumabas.” 

Ang salitang Memes ay mula sa ancient greek word na “MIMEMA” na ang ibig sabihin ay “to imitate things or itself.”

Taong 1976, unang ginamit ang salitang Memes ni  Richard  Dawkins, isang British Evolutionary Biologist sa librong kanyang inilabas na “The Selfish Gene.”

Nagsimulang maging popular ang Memes noong 1996 sa paglabas ng unang computer animated memes na si Baby Cha Cha- isang dancing baby memes. Buhat noon marami ng videos ang gumawa ng memes tungkol sa iba’t ibang paksa.

Bakit nga ba ngayon ay maraming gumagawa ng Memes?

Ang paliwanag ni Ma’am Vida Cagurangan, isang Psychologist at Training Consultant, ang mga posibleng dahilan ay ang mga sumusunod:

Isang hamon o challenge, bakit hindi ko din gawin? kung maraming nakagagawa ay kaya din natin gawin. 

Pangalawa, upang kumita at sumikat, kapag maraming viewers, kukunin ka bilang endorser at makatatanggap ng freebies mula sa mga ini-endorse na produkto. Mas maraming endorsements, mas sikat at mas maraming kita.

Ikatlo, hindi mawawala ang biruan at kantiyawan mula sa mga kaibigan, pamilya at kamag-anak para sa katuwaan.

Nakikiuso lang, ayaw pahuli o mapag-iwanan sa kung ano ang uso.

Bukod dito, upang magbigay ng “political statement”, ipaalam ang current o social issues at ipahayag ang saloobin, mas marami ang nanonood sa internet kaya ginagawa itong magaan at kaaliw-aliw, mas appealing ito sa mga kabataan at mabilis ang pagkalat ng memes.

Samantala, ang sabi naman ni Dr. Jayeel Cornelio, isang Sociologist, Director, Development Studies Program ng Ateneo de Manila University, nauuso ang memes sa Social Media bilang malikhaing pagpapahayag ng mga saloobin ng tao tungkol sa usapin panlipunan. Kung mapapansin,  malalim ang hugot ng maraming memes patungkol sa pulitika. Karamihan tumutukoy ang memes sa mga statement o ginawa ng isang pulitiko na hindi nila ikinatuwa. Ngunit imbes na kanilang ipahayag ang galit sa seryosong paraan, gumagamit ng memes na mas madaling maunawaan at ishare sa social media. Mas nagiging viral ito kesa sa mga seryosong pagpapahayag ng saloobin.

Sa palagay ni Professor Jayeel, ipinagpapatuloy lang ang mga nakagisnan nating Pilipino na editorial caricatures, mga drawing na nakikita sa newspapers at karaniwang nakatatawa ang mga content pero may sundot sa mga pulitikong kinaiinisan ng publiko 

Dagdag pa niya, maganda ang memes sapagkat naipahahayag ang sariling opinyon at mahalaga sa panahon natin, kung saan maraming natatakot magpahayag ng sariling sentimiyento. Paaala rin ni Prof. Jayeel na maging mapanuri, minsan kasi may mga memes na nagpapakalat na tinatawag na fake news.

Now, alam n’yo na ang memes, sa susunod ulit.

Please follow and like us: